木村衣著入門篇

又到我東瀛羊羊袋錢入你袋嘅時間。相信大家都睇左我段衣著示範片。若然你就咁睇段片就可以學哂所有野，豬公都會上樹啦。廢話唔多講，我而家逐一向大家展示點樣著先可以著到木村咁。

我鑽研木村衣著大大話話都有幾十年，呢條友嘅衣著一點兒也不簡單。我而家先傳授入門級比大家先。

上身ITEM：

最簡單嘅木村LOOK就係一件格仔恤衫加一條牛仔褲。揀格仔恤衫是有技巧的：

第一：大家千奇唔好揀有衫袋嘅格衫恤衫。

第二：唔好揀Oxford Shirt 嘅設計，即係兩邊衫領都有粒Button個種設計。

第三：唔好揀太鮮艷嘅顏色，亦都唔好揀太死寂嘅顏色。

第四：CUTTING方面要有兩方面注意：

A)     唔好跌膊

B)     寧願吊少少袖都唔好買大一個SIZE

我已經知道你地班友係到唸緊乜，就係去Uniqlo 買格仔衫，勸你地唔好去，因為由今個冬季起，Uniqlo 嘅格仔衫係唔見得人，CUTTING 差(我東瀛羊羊自問個身夠橫，著今季Uniqlo格仔恤衫都唔夠Fit)，仲要換埋塊樣衰TAG。須知CUTTING差已經係死罪，仲要將一件衫嘅靈魂──TAG 都換到咁樣衰，呢D衫不買也罷。我推介大家今年去無印良品買格仔衫，今年Muji 
嘅格仔恤Cutting夠好，但可惜塊Tag又係核突，不過，最重要係價錢夠哂大眾化。

著格仔恤切忌真空上陣：

意思即係話入面要著番件TEE仔，一來型D，二來可以形造一種FIT身感覺。

下身ITEM：

牛仔褲係每位麻甩佬MUST HAS 嘅ITEM。牛仔褲好似好容易挑選。讓我告訴大家一個事實，牛仔褲係最難揀。你地見唔見周街好興窄CUT牛仔褲？呢5、6年好興窄身牛仔褲，但唔係人人都可以著得好睇，窄牛加大頭鞋問你死未？遠睇你唔講我以為佢著緊襪褲；你地又見唔見好多年青人著埋D重口味洗水牛仔褲？

揀牛仔褲有兩點要注意，第一係CUTTING，要揀一條牛仔褲係襯你常著嘅鞋，同埋岩你身型嘅褲，肥或者大份就唔好著窄身啦，我見到真係要扔佢落山，一般黎講著直腳就唔會死，最好就係501褲型嘅牛仔褲，呢類牛仔褲襯REW WING 呢種Boots就最好睇。洗水紋就揀番Ｄ普普通通就得嫁啦。

牛仔褲要唔要洗？

本來打到上面個段我就收工嫁啦，但係早排我話比人知我條牛仔褲兩年無洗，D人即刻用奇異眼光望主我。周杰倫，余文樂夠一世無洗牛仔褲啦，又唔見你班友用呢種眼光望佢地？我兩年無洗姐，又唔係一世唔洗。

基於衛生情況，牛仔褲一定要洗，洗幾多同點洗視乎你條牛仔褲咩價位嘅姐，你買條幾千銀嘅牛仔褲就唔好洗咁多啦，D牛仔布洗得多會軟，洗水紋又會變淺（千奇唔好落柔順劑）。如果你係買幾百蚊條，LEVI’S 普通LINE個類牛仔褲，洗幾多次同點洗都唔怕啦，夏天就盡量避免著牛仔褲。

大家記得千奇唔好未學行先學走，學木村衣著一定要由淺做起，打好個根基，我上面教你嘅野係訓練緊你嘅審美眼光，學識咩叫做「衣稱身」，唔係貴野著上身就好睇，最緊要岩你身型和個性。如果你咁唔聽話越級挑戰，我唔想有你呢種讀者，我東瀛羊羊唔岩你，你可以唔洗再FOLLOW我。