我的著衫之道

　　一個人型唔型，好大程度上係取決於佢身上嘅衣著，好似我偶像黃博士咁，著恤衫西褲嘅時候會流露出文人學者嘅氣質，著Ｔ恤牛仔褲就展示出風流瀟灑嘅一面，唔信？有相為證！所以你話衣著對一個人係幾咁重要！

　　其實我覺得著衫同打online game一樣，著咗件靚衫出街就等於你撿到件好兵器，除左自信心返晒嚟之外，仲可以令你霸氣大增，遇神殺神，遇佛殺佛，，講句野都大聲啲，mk仔見到你都要行埋一邊。講起著衫，由細到大我嘅衣著都係交比媽咪全權負責，一來係因為我好怕一支公行入時裝店，比啲吊靴鬼咁嘅店員跟住晒，好似週身都唔聚財咁；二來係我好信得過媽咪嘅眼光，所以佢每次幫我買嘅衫都好啱我心水！我問過媽咪啲靚衫究竟係邊度買多，佢話一係就「佐x奴」、一係就「扑死你」喎，如果各位巴打睇完呢篇文，又想模仿下我著衫風格嘅話，都可以去呢兩間鋪頭睇下架！而家就同你哋分享下啦！

　　首先，係上身嘅衣著方面，我會比較堅持著恤衫，因為媽咪話過男仔著恤衫會斯文啲，咁樣識女仔都易啲喎。好似我身上呢件就係近期嘅至愛，係咪巧令令先！

　　有人話間條會著到人好老土，我就話佢哋唔識寶……我覺得呢啲應該叫做成熟穩重囉！顏色方面我就覺得愈沉愈好，除非你係做消防員或者交通警，否則著到好似果個乜鬼陽光男咁「SHARP醒」托咩……

    　至於講到著褲，通常天氣唔係太熱嘅話，我都盡可能會著長褲。點解？趁人少少先同你講，因為我天生就無乜腳毛，如果著短褲出街，唔知係咪心理作用，總之就成日凝住好似有人恥笑緊我唔夠man、成個女人咁，假如閣下同我一樣與生俱來就有「光管腳」嘅缺陷，一條有咁長得咁長嘅褲可以幫到你。當然，三歲細路都知呢個世界有樣野叫做夏天，如果你真係頂唔順三十幾四十度都包到自己對腳冚晒嘅話，可以試下著三角褲！呀……應該係三角骨褲先啱，當然長度都要有返咁上下，總之掩飾到你係「光管腳」就夠，好似我平時著開果條咁。

　　

仲有樣野唔記得講，如果閣下同我一樣，出親街都有十九幾萬樣野要帶，好似PSP、NDS呢啲精神食糧，咁就要帶多個袋。背囊方面，我就孭開SPI書包嘅（吓？SPI都唔知係乜？睇下面啦！）貪佢容量大體積小，心愛嘅漫畫書都可以放多幾本。當然你亦都可以用斜孭袋，為左配合返條褲嘅長度，我自己就鍾意將條孭帶較到水蛇春咁長（見右圖），總之就悉隨尊便啦！今次同大家講住咁多先，有機會再同巴打們分享下著衫嘅心得！