木村衣著附錄（木村衣著種類）：

木村衣著附錄（木村衣著種類）：

呢排我發覺街上面好多人模仿木村嘅打扮，我見到真係好痛心，呢班友根本唔明學習木村衣著係要經過長時間沉淫，游乎木村之源。我對上一篇文章已經講過唔可以未學行先學走，我敢肯定佢地一定無睇過我地「型男講座」嘅〈木村衣著入門篇〉；可幸嘅係近排有個毒男係某個Blogger上面打左呢段野：

「我覺得著衫同打online game一樣，著咗件靚衫出街就等於你撿到件好兵器，除左自信心返晒嚟之外，仲可以令你霸氣大增，遇神殺神，遇佛殺佛，，講句野都大聲啲，mk仔見到你都要行埋一邊。」[1]

我睇到呢到真係老懷安慰，眼淚都流埋出黎，估唔到有讀者可以係我嘅文章入面參透到衣著嘅真諦（詳情請自己抓文）。無錯！我幾時都講「人靠衣裝」係千古不變嘅大道理。雖然呢位讀者嘅偶像唔係木村，但佢能夠係我嘅文章入面有所得著我真係好安慰。由於太開心啦，我東瀛羊羊就私人教多你地少少知識啦。（我通常一個星期都係出一篇文，今個ＷＥＥＫ真係大出血）

衣著界蘇東坡

我地中國宋朝嘅蘇東坡號稱多面手，琴棋書畫樣樣通；而日本就有木村拓哉，任何衫穿係佢身上都可以化腐朽為神奇，絕對係衣著界嘅多面手，所謂「古今之衣著，至木村無餘能矣，千轉萬變而不可方物」。

Biker Look

呢個Look 嘅要求係極高，首先唔可以肥，最起碼肚腩唔好太凸。成個Look嘅精髓係皮褸同牛仔褲嘅緊密結合。皮褸唔可以太大件，一定要FIT身，必要時寧願吊少少袖都唔可以令件褸過長；牛仔褲絕對唔可以太花巧，以Unwash 為主，而且唔可以太闊。作為資深木村達人，我對木村呢身嘅衣著有點失望，你地望下佢對鞋，無錯，係方頭Boots黎，咁咪出事囉，不過鬼叫佢係木村咩，如果係街邊人著成咁我實指著佢黎笑，著方頭boots 切忌襯Slim cut牛仔褲，咁樣會營造出下重上輕嘅感覺，如果佢換番對圓頭嘅靴，我相信老蘭無人係佢對手。難度四粒星✩✩✩✩

美式OLD SCHOOL Look

        呢種造型相當之廣泛，木村只係表現左其中一款出黎，就係牛角TEE加舊PRINT 。想著成咁記得要著中袖，唔好著長袖。難度三粒星✩✩✩

車房Look

        呢個造型只係佢拍劇需要姐，大家千奇唔好亂咁模仿。難度五粒星✩✩✩✩✩

木村入門Look

        呢個Look我上一篇文已經講過，我再講係想強調番大家無論學任何衣著都唔可以未學行先學走，無論你想學阿尼姆斯，月光男定乜鬼俠都好，一定要打好個基本功，當你打好個基本功，你就能好自如咁駕馭所有類型衣著，如果唔係就好似空峒派七傷拳「一練七傷，七者皆傷」。難度一粒星✩

        我忽然無咩心情打落去，就咁打到呢到先。

---

[1] 小KENKEN：〈我的著衫之道〉，香港，2012。