音樂界的頭號型男

我承認羊羊吹色士風真係好型！
佢型除左係因為我嘅剪接技巧幫佢加左好多分之外……（得意mode）
的確……識得玩音樂嘅男仔……實在太過無敵喇！

你睇周杰倫出道嗰陣……

薯過薯蛋頭！
但係佢喺第一隻碟《杰倫（Jay）》入面已經展示左佢驚人嘅音樂才華！

周杰倫嘅出現扭轉左成個華語樂壇嘅發展……

佢個樣係點、個頭有幾薯……一切都唔重要啦！

不過！阿蓮我今日想講嘅頭號型男並唔係周杰倫！
而係五月天嘅結他手－－石頭

 

阿蓮我真係好鍾意五月天！
雖然係台灣樂隊，但係五月天喺華語樂壇絕對舉足輕重
大部分人留意五月天都會focus喺主音阿信身上
我都已經唔上一次聽人講話淨低嗰四個係「磅友」架喇
之但係由於阿蓮我由十幾年之前就聽五月天
由零六年佢哋第一次嚟香港開演唱會就年年捧場
我由始至終覺得喺臺上最迷人嘅都係佢……

等我同大家分析吓五月天喺臺上面嘅表現
冠佑係鼓手，佢就真係匿埋喺後面打鼓，幾乎見都見唔到佢
瑪莎係貝斯手，奈何佢生得又肥又矮，吸引力大減
最多人鍾意嘅主音阿信……佢成鬼日走音又失聲又剩！
我唔係想踩佢！如果唔係佢詞曲作得耍家，一早玩完！
剩低落黎兩個結他手，怪獸同石頭……

阿怪獸佢個人青靚白淨得緊要
石頭就唔同，時時刻刻都好有陣麻甩除，隔幾百丈遠都索到！

最難能可貴嘅係鐵漢柔情呀！！！

為你送上五月天第一支mv 軋車（賣飛佛）
片段入面長髮飄逸嗰個就係石頭

型！就係型！

我唔識彈結他，甚至係咩音樂都唔識
我知道彈結他彈得好嘅大有人在！
有黃家驅兩手聯彈、有亞洲之神黃貫中、仲有呢個有嗰個……

佢哋都好型！

但係我就偏愛佢
由內到外再到返外嘅狂野

投到好入嘅投入
你做得出彈得到，觀眾就會收到

我亦都想喺呢度同石頭講：
我好想同你婚外情呀！！！！！！！！！！

樂器唔可以亂玩

今期〈型男〉講型男興趣，剛好又見到東瀛羊羊吹色士風，夠膽在馬路上吹，真心覺得羊羊「型」仔！

在不少人心目中，尤其是年青一群，音樂很多時與「型」掛鈎。就好似謝霆鋒彈結他，彈到「掟」埋結他，呢一幕觸動好多人的心靈，被這種不羈的野性隨意吸引，更視作為「型」的表現。事實上，除了反叛的霆鋒，鋼琴王子李雲迪、郎朗，大提琴家馬友友，吹色士風的Kenny G等的音樂家，好多人一樣覺得他們好有風采，好「型」。點解呢?咪就係識玩樂器囉！

你可以會話，識玩音樂似乎是通向「型」的一門。事實是，各位型男千萬別以為，識玩一兩種樂器就可以叫「型」，於是又「求求其其」搵種樂器學下就算，這樣就大錯特錯！試問一個彈結他的，跟一個識玩搖鼓的，那一個比較「型」，答案當然是彈結他啦！你可以玩另類，揀搖鼓，但如果你可以玩搖鼓玩到出神入化，例如倒立用腳玩搖鼓，那我無說話好講，若然不是就乖乖地聽我說話。

基本上，不同的樂器可分成不同層次，以技巧越高超的越「型」，例如結他、色士風、鋼琴、小提琴一類屬高級別，若果在每次演奏的時候，能夠配合埋相應的手法或姿勢就更好，例如以下我心目中至「型」的「鋼琴小王子」，着住睡衣都可以表現到個種專注的神韻，你話幾「型」呢！

睡衣鋼琴小王子演奏會片段

至於管樂一類，例如喇叭、大號、小號等，氣勢強勁，可惜情調不足，正正由於比較吵耳，與浪漫氣息略嫌有段距離，君不見那些播到「爛」的電視劇，追女仔秘技必定離不開鋼琴、小提琴，勁少少咪吹色士風囉！(羊羊同我講過，《溏心風暴》的得得地陳豪都係「咪嘴」，連吹嘴都倒轉插，笑大人個口！)幾時有見過用喇叭做必殺技。(又唔係肚痛，使鬼喇叭咩!)

低層次樂器就是「小學雞」都識的沙鎚、搖鼓，最無誠意，不要說表演，一攞出來咩霸氣都無哂，重要俾人笑到面黃，(你估宜家係夏威夷！着埋草裙跳埋舞~)你話幾失禮，辛苦建立的好印象就這樣付諸流水，重點「型」得起呢！

所以樂器有高低，如果你是有心做「型」男，不如先發掘下自己興趣先，真的有心學樂器，就揀件似樣少少，無謂整「衰」自己。

新時代型男，齋靠樣點得啊!重要有內涵，周身刀張張利就完美啦~

有壓力墊底！

興趣，呢個詞語比人嘅感覺好悠閒和寫意。一般人會將「興趣」同埋「工作」分開，「工作」就係壓力，「興趣」就幫助舒解壓力。好多香港人都唔鐘意係「興趣」入面搵到壓力，平時返工已經夠辛苦！我唔想悠閒時都要受苦，我想享受。

                       (專家教 Saxophone 讀音，慢慢睇)

你可以當我嘅興趣係吹色士風，但你地知唔知我同色士風背後有幾辛苦嘅經歷？順便講一講，好多港人將色士風讀做SEX PHONE，呢個名無打格仔其實都幾四級。

其實色士風英文係「Saxophone」，中文譯名叫做「色士風」或者「薩克斯風」，所以英文應該讀做「’Sax‧o‧ phone」，平時我聽身邊d朋友都咁讀，你係香港人面前讀好啦，我敢包單，你係鬼佬或者用普通話做母語嘅人嘅面前讀，一定心唸你都幾淫賤，I play sexphone，you play sexphone very well。

我好記得有一年，我學到想放棄，因為我覺得好難，吹極都吹唔好，事緣有一次同位老朋友夾Autumn leaves，吹極都吹唔好(事後先知唔岩key, Alto sax > Eb, piano >C)，當時仲比佢恥笑，我唸左一陣，就記得老師曾經叫我玩Ensemble(清一色色士風合奏)，但我拒絕左，我即刻打電話比老師，話我想玩！由呢一個電話開始，注定我要將興趣同壓力掛勾。

壓力嘅源頭，就係要同人夾，你衰左，成team人都會衰，唯一解決方法就係不斷私下練習。我初時係連一粒音都唔敢,出，拍子亂哂，我真係好愧疚，覺得自己係一個負累。不過經過我不斷努力，已經進步左好多，Ensemble個位老師讚我可以獨當一面，不過其實我唔覺得自己有變過，可能係漸變掛，到而家我都仍然有壓力。我想講嘅係壓力係令人進步嘅因素，有適當嘅壓力係好事，唔好逃避佢，直接面對佢，咁先至係男人，老師咁樣讚我，我有時候無時間練或者唔得閒上堂，我真係覺得好對唔主佢老人家。

站係台上嘅感覺真係又緊張又興奮

同志同道合嘅人一齊，壓力算係乜？

(後話，曾經恥笑我個位朋友而家對我另眼相看，仲話見得人，呢種成功感真係幾開心。)

因為佢我至學色士風

興趣篇＠東瀛羊羊

正所謂認真做事的男人最型
型男講座呢期就幫廣大嘅讀者朋友發掘型男們認真投入嘅一面！

唔講唔知……見阿羊羊平時淨係識得扮木村
原來佢至耍家嘅竟然係吹Saxophone……
估佢唔到哩！

Aiya！又真係俾佢吹得幾型！
羊羊！我真心覺得你型過木村！！！！！！！！！！！！！！！！！

洋葱頭之獨愛

其實關於髮型丫、GEL頭丫，

呢類野係市面上都講到爛嘅項目，
我係呢度就費時講。

點樣GEL頭，
你俠哥我就一D都唔專業，
基本上GEL頭D髮泥應該捏喺掌心呢樣野我都係最近先知。
用咩泥用咩手法，
呢D我就算講我勸你都唔好信。

而點樣可以GEL到D咁嘅頭...


<自覺型男圖一>

或者...
<自覺型男圖二>

呢D咁嘅頭我就更加唔識。




就算芳華絕代嘅偉大嘅哥哥呢個經典髮型，
我都唔係好識...


<絕代美男圖>

所以我都係講番我自己一個比較鍾愛嘅髮型，
----洋葱頭!!!


事實上，我個人真係十分鍾愛洋葱頭，
分幾個層面講，
第一，我覺得洋葱頭最易打理，
成個頭整體短，
洗髮都易乾D。


第二，洋葱頭易搞易造型，
或者說，根本洋葱頭唔使點造型都已經有左個形。
GEL都GEL得簡單D，
兩邊短又唔使理嘅。
中間，用雙手落呢向中央按一按就係，
搞個頭唔使一個字。




第三，就係洋葱頭比我個Feel正。
我覺得好清新，
好精神，
好有活力、好有魄力。
好smart。


不妨搵d洋葱頭嘅人黎睇睇。


佢就大家都識，
幾靚仔丫!

或者唔好本身搵個靚仔黎睇，
咁呢個，個頭都幾型嘅。

對髮型的執著

大家唔好睇小kenken平時講野閃閃縮縮，成個小毒男咁，就以為我對好多野都無乜所謂，其實我對於某一樣野都幾執著，就係自己嘅髮型！蘇軾喺答唔知邊條友仔嘅時候話過寫文章要「大略如行雲流水，初無定質」，咁就自然會「文理自然，姿態橫生」，繼我話生頭髮都係同一個道理，即係話要由得佢自由自在咁生長，順暢自然先至能夠達到儀態萬千嘅境界！所以我對於使用甚麼gel頭產品完全係唔讚成，甚至乎有啲反感添，因為呢啲野完全係違反大自然嘅定律……再加上地球先生已經病咗啦，我哋何必再用呢啲咁唔環保嘅野嚟令佢病情惡化呢？！

　　其實要創造出屬於自己嘅髮型風格，又洗乜一定要靠定形水又或者髮泥呢？就好似小kenken咁，打從一兩歲開始，媽咪就幫我梳「彌敦道9號」髮型，連葛民輝、八兩金、盧廣仲都係抄我架（有相為証，絕無吹水成份）！一梳就梳足廿幾年，到而家都仲能夠堅持住，我會叫呢種堅持做「對髮型嘅執著」！只要小kenken一日未有脫髮嘅危機，一日都會繼續梳落去！作為型男，就應該要有呢種執著（唐天俠上身mode）！

198x年嘅小kenken

2012年嘅小kenken……都係自己睇片把啦……

你個髮型出事呀喂!

well well well...
型男們 當你仲躊躇緊究竟follow太陽男定東瀛羊羊嘅gel頭方法嘅時候
我可以話俾你知 你首先要去剪返個頭!!!

 你見東瀛羊羊都話齋：gel頭係唔想浪費髮型師嘅心機!
咁啫係話 其實gel頭都只係突出你剪嗰個頭嘅啫!
個頭一pat嘢咁 點gel都嘥氣!!!

 拿拿拿 千祈唔好問我喺邊度剪至好
我真係答你唔到!
但係有一度我就非常建議大家唔好想幫襯嘅……
就係………

去親都非死即傷!
聽聞阿邊個邊個咪就係成日幫襯!
你睇佢個頭……
 之但係咁 又唔係話個個都唔可以剪冬菇頭嘅
你睇佢…… 同埋佢……

人哋個頭剪得好好睇睇 面型完全撞啱個髮型
菇都菇到風生水起!　型呀!!!

 

為你的頭髮好好打扮

太陽男GEL頭可謂資歷深厚，自從小學開始GEL到而家，日日GEL，風雨不改。有好多人都話唔識GEL，GEL完好似一PAT野咁，所以今日就教大家幾個簡單步驟，你就可以好快學識基本GEL頭方法。

你可以選擇用髮蠟或髮泥。個人黎講，因為我的頭髮較軟，難定型，所以我揀持久力強、定型較硬的髮泥，會容易啲造出你想要的效果。而GEL頭前，最好先洗頭，再吹乾(接近九成即可)，因為呢個時候既頭髮係乾爽同埋好有彈性，容易造型。

大家可以開定東瀛羊羊GEL頭段片以作指導。

步驟1：

塗出少量髮泥於掌心中，然後平均地搓揉，再於頭髮表面輕掃，讓頭髮表層塗上少量髮泥，緊記要輕掃，否則會令頭髮即使沒有彈性而黏合一起。記得手指間也塗上少許，這樣較易造出毛束感。除劉海部分外，整個頭都徹底輕掃。

步驟2：

於頭頂部分，頭髮較密的地方，輕輕地在髮尾位置扭成一支支，就好似日系男明星個造型咁，成隻刺蝟咁，你也可以再於指尖上塗上少許髮泥，在其他位置加強這髮束的效果，緊記無須用力拉扯，只要輕力便可。又或者稍稍用力抓頭頂較密的部份，讓髮泥塗在髮根上，使頭髮更定形及更有動感。

步驟3：

髮尾部分可嘗試造出燕尾的效果，拉出髮尾，讓正面也看到燕尾的效果，當然，稍稍即可，無須太誇張。劉海部分無須用太多髮泥，只需在最後造出較粗的髮束便可，簡單一點，便是把它撥向旁邊，不要蓋過雙眼。

步驟4：

造型完成後，最好用定型噴霧稍稍為頭髮定型，因為不論髮泥或髮蠟，佢既定型時間係唔會超過六小時，過左造型就會開始TRANSFORM架喇，所以如果你有整天既活動，最好都係噴噴佢。仲有一個重要步驟，用風筒稍稍吹乾，咁會令佢更加硬淨。

以上只係最基本既造型方法，只要掌握當中「輕」這個要訣，你便好快掌握到GEL頭就好似畫素描咁，係一層一層咁加強效果。

GEL頭，別太依賴

GEL頭篇．．．．．．我真係唔知由邊到開始講。大家唔好比段影片誤導，我東瀛羊羊日常生活係唔GEL頭。嗯，不如咁講啦，型男唔一定要GEL頭，GEL頭嘅唔一定係型男。

我曾經GEL過頭，不過都六、七年前嘅事。而家都有GEL，主要都係剪頭髮時先GEL，GEL嘅原因係唔想令到髮型師浪費心機。我知道幫客人GEL頭係髮型師嘅成功感所在。至於我唔GEL頭嘅原因係因為驚甩頭髮，仲有就係朝早想訓多陣，有更多精神做其他野。

摩連奴(右)完全將C7壓下去。

我見時下好多年輕人，特別係16至18歲個一類，太過依賴GEL頭，佢地嘅自信建立於佢地個髮型上，佢地覺得咁樣就係型。型唔係咁嫁，GEL頭只係輔助，你想真正成為一位型男就要由心態上做起，做人處事要公正認真，咁樣就自然散發主一種型嘅味道。舉一個例，西班牙足球會皇家馬德里（簡稱皇馬）嘅教頭摩連奴本身就係平頭短髮裝，基本上佢係一個中年阿叔，但佢站立於皇馬眾年輕球星中都不失型味，C朗、卡卡、干查奧夠型啦掛？但係好多人都唔覺得摩連奴會輸比佢地囉。點解摩連奴會咁型？佢著衫唔潮，又唔高，但係憑主佢執教嘅認真，坐係帳篷運籌帷幄，調兵遣將；雖然多次輸比巴塞，但屢敗屢戰。呢種堅持令佢散發著一種獨特氣質。

干查奧

摩連奴

         

              VS            

                     

各位型男，如果你真係認為GEL頭GEL得好就會變型，不如你地改變下你地嘅心態，一個成功男士並唔係靠GEL頭變出黎（衣著也如是），而係努力堅持，屢敗屢戰，逐漸地，你就會悟出型嘅真諦，如果你嘅人生咁有堅持，我夠膽講，你就算光頭都係一個型男。正如頭先楊怡係《ON CALL 36小時》到講：「我覺得男人專心做野係最吸引。」，男士們，GEL頭只會幫你加少少分，明白沒有？

我嚴重警告大家唔好再笑我段片，我真係會發火唔寫。你地因為咁而無得再睇東瀛羊羊教你地型嘅道理係你地嘅損失。

生髮, 護髮, 有辦法!

要有一個很好的髮型，是要有很多的頭髮去支持，東瀛羊羊之所以咁型，無可厚非是他有一頭烏黑濃密的秀髮，讓他可以隨心所欲設計不同的髮型。而根據小妹的非正式統計，百分之一百的男士極之介意自己「禿頭」，並且都認為是打擊自信的一大問題。

想知羊羊點型?!click入去睇下啦~
http://www.youtube.com/watch?v=OQV1GUTQJOw

你有脫髮的煩惱嗎?

「三千煩惱絲」，絲絲扣入心，提起「脫髮」，男士們都聞風色變，惶恐終日會發生在自己身上，「脫髮」堪如瘟疫，甚至是世界沒日。連GEL頭型男東瀛羊羊也曾經對小妹講過不止一次，「我一條頭髮值一蚊美金」，可想而知「髮根」對於男士而言是「命根」，個個「惜髮如金」，更何況型男是「靠樣搵食」。

所以，又到路邊草「出手」的時間!其實正常人每日會掉五十至一百五十條頭髮，俗語都講「舊嘅唔去新嘅又點嚟」，頭髮掉落是正常的新陳代謝，髮囊老死當然會掉髮啦!

想頭髮「硬淨」、「烏黑」、「唔易甩」，方法很簡單。

型男第三步，從養髮開始。

「髮宜多梳」是很多的養生專家都提倡的養髮方法。千萬別以為我「廢噏」或者「hea吹」，事實上「梳頭」可以疏通血氣，促進頭皮血液循環，使得每一個位置都得到血養供應，營養夠，髮根自然牢固，頭髮也就烏黑健康。

                       

   1. 由中往外梳，再由兩邊往中間梳。      2. 由前向後，再由後向前，

                                                                          每次梳頭約五十次。

*梳頭時別過份用力，以免刮傷頭部皮膚，輕柔就可以。記着你是按摩頭皮，不是「起草皮」！

適當的按摩同樣有助預防頭髮稀疏，利用指尖活動刺激頭皮「百穴」位，亦可以達到養髮效果。

頭面的中心線和兩耳連接線交叉的地方

，是「百穴」的穴位。

最近比較忙碌，今日說到這裏，下次有機會再教大家飲食健髮之道。(唔講唔知原來甩頭髮關個腎事~)

GEL頭篇@東瀛羊羊

呢兩個禮拜型男講座仝人都同大家講咗好多有關面部護理嘅睇法
今期就講個頭！！！！！！！！！！！！！！！！！！！！！！！

羊羊好型呀～～～～～～～～～～～～～～～～～～～～～～～～～～
更多精彩片段喺下面！咪走雞！！！

增加持續護膚恒心的方法

護膚的動力與恒心  唐天俠

其實，天底間每個想護膚嘅人，

心底都係懷有自己獨特嘅理由。

有D係為左好簡單好簡單好簡單，單純係咗靚，

佢地覺得自己本身靚就係令自己開心嘅理由。

有D可能靚唔靚就冇乜所謂，

不過要為左討好自己嘅心上人，

就唯有加把勁護膚，

然後變靚D比自己個心上人睇。

而更多其他千奇百怪嘅理由都有，

可能亦有D人係為咗愛黎影靚相擺上Facebook威威都未定。

既然個個都有自己嘅理由，無他，呢個世界好多元嘅。

最緊要，係認清自己嘅動力來源，

然後將呢個動力變成恒心就可以了！

講到恒心...

不知在座各位，

有冇人內心係其實好想護膚，

亦成日問人點護點護，

但總係唔落實、或者開左個頭不過半途而廢呢？

其實，

所有野有諗頭嘅時候好激動、

計劃嘅時候雄心勃勃、

初期添購嘅時候好豪爽、

第一次嘅時候好落力...

但係最後冇下文者，

天下間多之又多。

正如路邊草所說，

持之以恒，就可離皮光肉滑不遠。

然而，

天底下間，最難嘅事不就是持之以恒嗎？

所以認清動機，把握動力，

之後可能就要化得成為恒力，才是王道。

我覺得，唯一可以做嘅就係，

搵方法或搵工具不斷提醒自己。

一，係廁所門或者房門整D不易清刷嘅提醒字句，

每次出房門、出廁所門，都見到：「想人見人愛、所向無敵，仲HEA！快D去洗面爽膚敷MASK啦！」。

二，將自己買護膚品張收據貼係家中當眼處，

提醒自己唔護理就白白浪費左呢大筆金錢。

三，將自己要護膚嘅事講比幾位好朋友聽，

等佢地間唔中見你多幾粒瘡嘅時候就問你：咦你唔係護緊膚咩？！

四，可以用工具！

好多人家陣情願去無聊掛機開FB同Youtube，都唔去做正事。

咁對住電腦，

梗係要善用電子工具啦！

可以用gmail日曆！！記低自己逢一、三、五要大護理，而每日晚上23:00要小護理，

用埋Rainlendar hold係桌面到，而且到時到候提自己。

再絕d就叫gmail一到護理時候就send SMS比自己！

以上咁多項加埋，都推動唔到自己去持之以恒嘅，

咁由佢，由佢繼續爆瘡、繼續唔靚落去罷啦！

畢竟我相信一句：但凡選擇必有代價。

選擇靚，唯有付出努力，

選擇HEA，代價就係個樣，

自己諗掂佢。

邊有時間做護理

 大家都話護理對男女有幾咁重要，對皮膚有幾好，有啲吹到同溝女扯上關係添。當然，長遠黎講面部護理對人的外貌都的確係重要既，但大家有無呢個恆心去做呢? 當我呢條問題都未問完既時候，我好相信已經有人搶住答有，得! 等我幫大家計計條數!!!

http://wearesohandsome.blogspot.com/2012/02/blog-post_5786.html

保護篇@唐天俠

呢段片由小弟親自操刀，唔包動作指導，場景佈置，打燈，食飯，出糧等流程，淨係由唐天俠佢洗面開始，一直到最後敷MASK(仲未計用晚霜)，已經用左整整兩個鐘!!你大可以話唐天俠佢有豬既特徵——慢吞吞(拿拿拿，唔好以貌取人人呀你地)，但我地家下姑且用住呢個作參考時間先。

以上既步驟，都會係晚上先會做(除非你既工作係量地)。就當各位係下午六點正收工放學，七點正俾你番到屋企，又剛好屋企煮好左飯，就七點半開飯啦，食飽飽加埋洗埋個碗，八點半了。係時候沖涼啦，俾你沖半個鐘(珍惜水資源呀)，九點正係你全日最乾淨既時候。咁你就做頭先我地係上面所講既步驟，為你塊面做護理，兩小時內完成，(你話邊有咁慢呀? 做慣左咪會更快囉) 好! 就當個半鐘。當你做完以上護理既時候，已經十點半。你話仲有時間做你既野嗎? 等我幫大家列埋個表：

1. 睇型男講座 (呢個梗係首要啦)
2. 傾電話
3. 上FACEBOOK
4. 玩WHATSAPP
5. 打機
6. 繼續做公司野
7. 做功課

有人話做慣夜貓，所以有大把時間慢慢做。根據路邊草超詳細既分析，唔捱夜係對面部護理其中一項首要既條件，當你十二點正訓，咁即係話你只剩下個一小時做你私人野，當中可能你追埋「型男講座」既正片已經用左半小時… …

唔好以為係做護理步驟期間你可以抽時間出黎，可以邊敷MASK邊上「型男講座」，睇電視，傾電話呀，你知唔合敷MASK就好似把劍咁，兩邊刃架，敷既期間你咪笑呀，一笑有條皺紋你就大檸樂，到時你敷幾多張都無。啲火山泥敷落塊面都唔係講笑架，好似幫你塊面打左石膏咁，係你想笑都笑唔到，係硬得離譜!!

唔好誤會，我唔係叫你唔做面部護理，我只係覺得太費時喇，對而家既我黎講，連訓都唔夠時，仲邊有心機搞上面既野，我好同意路邊草個句，內在調理都好重要，捱少啲夜，食少啲煎炸油膩酸辣野，平日生活習慣做得好，夠健康，其後既護理相對所花既時間同精神都會減少了，不應過份依靠以上的護理步驟。

早啲訓啦!

護膚品的背後

護膚的方法

唔好期待我會推介邊隻產品，我今日要講嘅係護膚的方法和態度。HEY！又話唔推介產品但又講方法，你想點呀東瀛SAN。冷靜D先，我唔推介產品係有原因。

其實每個人皮膚唔同，皮膚根據面油多少分為油性、中性、少油等膚質（大致分類），K先生用產品A好見效，但係唐先生又未必岩。所以，我推介產品係無意思，話唔埋管理員以為我係到賣廣告，BLOCK左東瀛羊羊呢個ID。即係話，大家應該根據膚質來決定用乜產品。

咁點樣先知道自己係邊類型膚質？要清楚了解自己嘅膚質，最穩陣當係去美容院啦，但坊間傳聞一個測試，就係洗完面後，等半個鐘，睇下面部皮膚係乾爽或者油油地，如果係後者，即係你大半屬油性皮膚；而前者就係中性或少油。

知道自己係邊類型皮膚後，就可以去選購適合自己嘅產品。冬天就要保濕；夏天就要控油。

護膚的態度

有人．．．．．．有好多人都會見乜買乜，阿Ａ話好用就跟主買，結果浴室堆滿不同種類嘅護膚產品。其實用護膚品應該有一種堅持，呢一種堅持指唔好短時間內試不同嘅產品，咁樣做只會得不償失，對皮膚唔係一件好事！呢種堅持建基於選擇合適嘅護膚品上，其實某程度上，同我之前講洗面個篇文章係有點類似。

其實做型男係任何方面都要有呢種堅持，就舉我東瀛羊羊黎講，我一向都堅持我嘅衣著係走日系木村簡約路線，我唔會無啦啦走去跟Eminem 著XL衫；我捧曼聯就係一世死獌狗。持之以恆往往會醞釀出自己一套型嘅哲學。

救救K先生

上次同各位巴打絲士打分享完小弟對化妝嘅睇法，今次就想講講護膚嘅問題。話說小弟最近玩開facebook，無意中見到一位仁兄嘅相，令我深切明白到護膚嘅重要性。事不宜遲，有圖有計傾（為咗保障返當事人，相片經過小kenken特別處理）！

相中人係小kenken嘅一位朋友仔，我哋姑且稱呼佢做k先生。k先生嘅樣貌如何唔係今次討論重點，所以暫且不作評論（如果大家想睇又唔怕隔夜飯都嘔埋出嚟嘅，可以私底下問我拎相），不過大家知唔知點解k先生每次影相都要擺出啲咁惡頂嘅pose？知唔係因為佢嘅皮膚差到無人有，所以咪懶係好QQ咁搵對手嚟遮住塊又油又多暗瘡嘅月球面囉！

其實小kenken最初已經勸過k先生好多次，叫佢認真咁研究下護膚之道，又或者可以睇下我哋「型男講座」入面各巴打同絲士打嘅分享，點知佢硬係當我講嘅野耳邊風，左耳入右耳出，仲話咩男人老狗學人護膚成個女人咁，結果搞到啲皮膚愈嚟愈差，而家影親相都要拎起隻死人手嚟遮醜，甚至乎已經走火入魔，真係完全唔理其他人嘅感受！作為老友嘅小kenken見到k先生咁樣真係好心痛T.T，奈何我又唔多識護膚之道，唔知點幫佢好……

　　希望各位對護膚有心得嘅人士，能夠過返小弟兩招，等我點醒下k先生啦……

敷不完的mask

敷mask呢家嘢
對於女仔嚟講係永無止盡嘅
閒閒哋屋企十支八支梗有喺度
行過旺角銅鑼灣尖沙咀，一街都係莎莎卓悅又梗會買多兩支
最後咪又係放假嗰陣先敷佢百幾二百個鐘
再唔係就旅行嗰陣帶哂去，同班friend柴娃娃敷住映相
好似咁先至叫敷mask

男士敷mask真係買小見小
佢哋對面膜嘅知識淺薄到嚇死你！
基本上係佢哋對護膚嘅知識好似井底蛙咁
（我同路邊草都鬧過佢哋N次　詳情請按’較舊的文章’）
又或者十居其九都柄埋喺自己間房度敷
驚死俾阿爸阿媽知道會同佢脫離父子關係咁款

型男們
如果你哋本身有個靚樣就keep吓佢啦
男人唔keep老得仲快過女人
如果你哋本身自覺條件不佳的話
就更加要keep
你地唔想自己又少左件武器加嘛係咪？

根據非正式統計
一個皮膚滑溜乾淨嘅男仔　溝女成功指數係95%
當你睇女人外表嘅同時
我哋又何嘗唔係睇緊你先

市面上有好多適合懶到出汁嘅男士嘅保養品
我菠菜蓮極度推薦Sleeping Mask！
大多數嘅Sleeping Mask同普通Lotion一樣無色無味
搽左好似冇搽咁！
只要訓教之前搽勻全面，訓醒就會好似剝殼雞蛋咁！正呀！

護膚其實很簡單

「唐天俠平日烏烏歪歪，估唔到佢都會學人護膚，既然係咁又係小妹嘅教學時間啦！」話說上兩個星期我教大家「洗臉」做型男，假若真的持之以恆，大家應該離光澤滑潤的肌膚不遠，但如果你還未開始，「仲唔嗱嗱聲action，等得嚟都蚊訓啦！」言歸正傳，今日小妹會教大家如何好好保養皮膚。

正所謂「工欲善其事，必先利其器」，想要做好皮膚保養，第一件事先要認識各種護膚品。簡單點說，護膚品分﹕

A.     爽膚水(toner)，香港叫爽膚水，台灣和中國大陸等地叫化妝水，其實都是同一種東西。於洗面後，塗抹面霜前使用，作用對肌膚補給水分。在秋冬乾燥的季節使用可收緊毛孔，平衡皮脂分泌，以及調整皮膚PH值(酸鹼度)，使肌膚柔軟及濕潤。

B.     精華液，於爽膚水後，塗抹面霜前使用，作用為重點加強，功能較單一。例如美白精華液、抗皺精華液等，現時市面陸續推出多功能精華液，用家可因應個人需要選擇。

C.     面霜，在爽膚水、精華液和眼霜之後使用，作用是封鎖水分，加強保護。市面上有提供不同年齡層的面霜，選擇時要小心，切勿選錯，不合適的護膚品往往會導致皮膚「暗粒」產生，到時候就真的適得其反。

D.     眼霜，顧名思義，眼部的專門護膚品，因為眼部皮膚是全身最薄、最脆弱的，所以特別與面部其他地方不同。

型男第二步，從護膚開始。

如果能聰明地運用好爽膚水和面霜，要擁有傲人的滑潤皮膚並不是難事。

*切記洗完臉千萬不要立即塗上保養品。因為皮膚本身懂得分泌油脂，作自我修復保護，如洗臉後即時進行護膚步驟，沒錯是能達至最有效保濕功能，但同時會削弱皮膚本身的抵抗力，因而容易出現皮膚問題。(所以小妹建議各位在洗面後15-30分鐘後才進行保養為最好，當然若果是油性膚質可縮減至5-10分鐘。)

1.     潔面後，把爽膚水(份量約港幣五毫子大小)倒入手掌並在掌中揉開，再輕輕拍打、按壓臉部各個地方。(其實最妥當的做法是用化妝棉，不過小妹深知大多數的男仕都是怕麻煩，所以手是可以的，只是沒那麼均勻罷了！)

2.     拍上爽膚水後，就是精華液的時候，把精華液滴在手中，同樣揉開和輕按在面部。(記住精華液一兩滴便足夠，太多會造成浪費，而且一定要用「印」、「按」的方式，如果用「塗」的方式是會「捽」出「老泥粒」，同樣是浪費，皮膚根本沒有吸收到。)

3.     在無名指指頭上擠出米粒大小的眼霜，輕輕點印眼袋位置。(眼部皮膚極之脆弱，千萬不能大力，不然會扯傷皮膚，到時候就得不償失，別要怪我沒先提醒過你！)

4.     最後塗上晚霜就大功告成。

5.     特殊護理如面膜、深層清潔等，並不適合每天使用，一星期1-2次就OK！

*特別注意﹕

除外在修護，身體內在調養亦非常重要，當然第一件事就是別捱夜，捱夜是會加速皮膚老化！飲食上亦應該少吃辛辣食物，煙酒更是盡量少沾。

        雖則古語云「女為悅己者容」，但是保養得宜的男仕亦同樣令人眼前一亮，方法就在此，跟從與否隨個人喜好，希望大家都有光潔皮膚，好像木村般自信。

保養篇@唐天俠

上次有小KEN KEN教大家點化妝，但經常化妝對皮膚唔係咁好，
因此，今期有唐天俠教大家點去保養皮膚，去片!!

化妝，不要過火咪得囉

化妝，不要過火咪得囉。

化妝有時係必要架，因為佢的確係實用性強。
有暗瘡，用遮瑕膏。
雙目無神，用睫毛液。
面無血色，用胭脂。
甚至愛靚人士既天敵，有皺紋!! 唔駛驚，有神仙水。

你睇你睇，化妝既威力幾咁強大。
咁又係咪一定要化呢?

兩個情況你一定要化：

情況一：病到五顏六色
男士生病，切忌暴露自己孱弱既一面。牛高馬大，但見到你面無血色，塊面蒼白過張白紙既，一係你唔好出街，如果唔係，為塊面稍稍加點紅，讓人覺得你「仲未死得」，起碼唔會覺得你弱不禁風，仲可以保持你既形象。當然都有例外，好似今日曾老師咁，雖然話病左兩日，但仲係咁生猛，呢種猛男去化妝都只係畫蛇添足架喇。

情況二：影相
同你班朋友食個飯，聚會，同情人慶祝XXX紀念日時拍照留念，你總會有機會入鏡。如果你化左少少妝，你絕對係相中的焦點!!! 因為人既面部色彩基本上是不及周遭環境的鮮艷(除非你係皮膚係亮白得很/係紅唇烈焰)，因此化妝正好為人偏暗的面部添加了色彩，令人睇起黎更精神，效果係特別靚。重點就在於你能否把握箇中的尺度，如何達至「化左妝又不覺化左妝」的境界，不會化到好似黃夏惠嬸嬸咁，猶如蜻蜓點水般，關於呢個問題，我就答你唔到，我影相個陣我會答到你既。

小KENKEN個妝，特別係個條眉，我諗係失手畫出左界，係迫於無奈地畫粗左少少遮。都係個句，唔好過火咪得囉，起碼佢無畫到上髮線上面丫。
你地自己睇番喇：http://wearesohandsome.blogspot.com/2012/02/kenken_14.html

臉孔裝甲

呢個世界，家陣講男女平等，

男人固有嘅權利，現在女人都可以擁有，

按照呢個邏輯，平等而言，女人固有嘅權利，現在男人都可以擁有咯？

另外，

有人可能覺得，男人為咗靚仔D，出街都Gel頭啦，

咁點解唔可以為咗靚仔D而化妝？

冇錯，係邏輯上男人為靚仔Gel頭，咁係理論上、本質上黎講，

化妝都應該冇問題。

但事實上，男人化妝，睇下咩情況啦，

假如純粹係為左想出街靚仔D，

化個妝搞到自己男唔似男，女唔似女咁，

講到底，都係接受與唔接受嘅問題啫！

或者有人接受到，

但奈何，我個人就唔十分接受到。

然而，出街見到個咁嘅粉樣，

基於忠恕之道，我地都係要包容嘅，

可能未必係佢嘅錯，可能係佢父母嘅錯都未定呢。

<類似妖男圖>

   

(今回冇得打眼部陰影，因為主要我想突顯佢對眼。)

畢竟，男人要有英雄氣，

勝在意志、勝在氣魄，

應當從宏觀處著眼，目光遠大，心懷天下。

與其花時間在呢D過眼雲煙嘅細節處矯揉造作，

不如去諗下點樣自強不息。

然而！

雖說男人不應在出街為咗靚仔D去化妝之上而磨磨蹭蹭，

但有特別情況，化妝都可以接受嘅。

問題在於，為乜化、同點樣化。

有些時候，可能係出使其他公司外交、或者要去某些重要場合，

為了爭取最好嘅成果，化一些妝去讓自己看起來精神些、可靠些，

這種具演員性質嘅化妝，我就認為可以。

刻劃清自己嘅輪廓、營造出深邃嘅目光，

有時候都要靠少少技巧嘅。

見到個咁嘅樣，你D外交對象都可能有多些許好印象，你D對手都可能有多些許壓力吧！

<精神帥哥圖>