究竟點樣先可以有至「型」的言行舉止，
就等四位型男身體力行話你知啦!!!
小KenKen終於鼓起勇氣去表白，
想唔想知道他的結局，
記住緊貼〈型男講座〉!
2012年3月30日 星期五
2012年3月26日 星期一
我有我風格,懶理你感受
四位型男各有四種不同的風格，
有人粗枝大葉；有人拼命耍帥；有人陽光熱血；有人毒不可耐!
究竟他們面對不同事情時，又如何表現「型」?
而這件事是發生在某一個日子裏。
想知最新發展，記住緊貼〈型男講座〉!
2012年3月24日 星期六
衣著進階篇──軍褸
今期型男講座教你軍褸！如你覺得自己身材夠高夠橫，不妨大玩Military Look！軍LOOK 係歷久不衰。
美國大哂
世界有差唔多數百個國家，每個國家都會有軍隊，但由於美國太強大了，不單快餐、荷里活影響全世界，就連軍褸文化都係以美國為主。好多牌子出嘅大褸都係以美軍軍褸作為藍本，例如M-65、A-2、G-1、MA-1、L-2、Tanker等等。聽個名大家一頭霧水，你地睇下左方的圖就會發覺好熟口面。
 |
| M-65 Field Coat |
 |
| A-2 jacket |
 |
| G-1 Jacket |
 |
| MA-1 |
 |
| L-2 |
 |
| Tanker(呢套咪係Taxi Driver囉) |
重要概念：原版、復刻、民用版、潮版
上文提及兩個概念：「原版」和「復刻」。所謂「原版」，即係美國政府發訂單比廠商所出嘅軍褸，簡單d黎講即係軍用版，係美國大兵所穿嘅褸！呢類型軍褸嘅Size一般黎講都好大件，筆者自問都算中等身型，但係只能夠Handle 到Size Small Short；「復刻」係指Reproduce 好耐以前嘅軍褸，例子有二戰的A-2、G-1。現今世界「復刻」分兩條路線，第一條係歐美路線，即係Cutting、Details、用料都跟足原版。第二條係日系路線，Details跟足原版，但Cutting會改至fit 身，以迎合日本人身型，至於用料會用最頂級(其實二戰時物資短缺，用料都係好粗糙，不過日本人做野就係咁認真)；而民用版係另外一回事，cutting無變，但用料同Details會跟原版有點不同，優點係性價比高，最出名民用版軍褸公司就係Alpha Industries；至於潮版，即係潮牌出嘅軍褸，例如HARE,
NBHD, VISVIM, WTAPS，呢類型牌子所出嘅軍褸都唔跟足原版DETAILS，改哂CUTTING，目的係為左岩亞洲人著同埋….潮。其實想跟邊條線走都無所謂，最緊要自己玩得開心。潮牌我唔講啦，呢個系列專介紹原版、復刻、民用版。
上EBAY尋寶
一件質素極差嘅復刻皮製軍褸講緊要港紙$3000，頂級嘅唔洗講。假如大家手頭上無乜錢又想玩原汁原味，不妨買件CVC jacket。CVC stands for「Combat Vehicle
Crewman」，屬於Tanker jacket，比坦克成員穿著。價錢非常便宜，由10元美金到2、30不等，視乎Condition而定，但前題係大家要唔怕二手衫，呢d衫係美軍著過，真係有血有汗…… 物主可能已經英勇犧牲！
唔想煩嘅話，不妨去旺角軍用品鋪頭行下！仲可以即場試，CVC JACKET 唔難搵！
 |
蔣介石總統身穿B-15類軍褸...... 當年中國(民國政府)向美國訂購大量軍備，蔣公係衣著上絕對贏哂中國紅太陽(亦都反映到咩人係抗戰最出錢出力)。解放軍都要行埋一邊！ 中間個位係美軍戰俘，機師黎；左右兩邊係日本仔。呢位機師身穿B-3軍褸，做俘虜都不失霸氣。 |
2012年3月19日 星期一
2012年3月18日 星期日
認真的男人最「型」
講起興趣，不由得令我想起一個人。話說草妹有個舊同事，用型男形容嘛，太膚淺啦！叫白馬王子呢，又太童話！總之他外型確實具備每個女孩心目中的理想條件。姑且暫時稱呼他做「王子」，我沒有「亂作」，事實他每次出現，在場所有女士，上至主管，下至教練、接待姐姐、掃地阿姐，十足十見到真的王子一樣，百分之九十九都會眼睛閃閃發光，當然餘下那一個百分比是我啦！又不是「花痴」，我可是認真工作的「好孩子」！
話題扯遠了，王子喜歡游水，甚至可以講是「瘋狂」，與其話興趣，不如說是愛好較貼切。王子本身就是游泳健將，是逢比賽必見的情況，而他熟悉一切游泳有關的事情，稍稍提及就會滔滔不絕，有同事甚至形容「想識王子講游水啦」。最初認識王子，我沒甚麼印象，倒是覺得他「瘋人」一個，整整一個夏天在水中生活，除了食飯、睡覺和方便的時候，其餘時間都泡在水裏，每年暑假都曬到「炭」一樣，全身上下只有泳鏡下面是白晢的，完全不顧自己身世形象。
對於很多女士而言，認真的男人最吸引，雖然第一印象是由外表建立，但要持續提升「型」的指數，就必須由內在出發。王子的幹勁我是肯定沒有，但對於他游水的熱衷和投入卻是佩服，至少我做不到。
老實講，當一個人認真投入的時候，會散發出令人炫目的光彩，「型」就是這樣來的。「新水怪」菲比斯之所以「型」，不是因為他的樣子和外型，也不是因為他的技術，而是在於他對於游泳的一份執着和認真。
 |
菲比斯
型男之道：又要威又要戴頭盔
型男嘅興趣點解一定要係「活動」黎？其實衣食住行都可以係興趣之一，大家千奇唔好比四位型男嘅興趣限死左。有時係露台開枝紅酒望主個日落都可以係一種興趣；將自己個衣櫃放滿哂靚衫都係一種興趣；專買物業都可以係一種興趣（投資都係一種興趣（笑））；專儲鞋都可以係一種興趣。只要係能力以內就可以了。
唔好亂跟．．．．．．之前我都解釋左。近日我係虛擬世界流連，見到一位大學生要借財仔。
財仔係仲衰過安Ｘ（Ｘ信）兄弟個類型嘅借貸公司。佢本身只係差銀行信用卡$10000多Ｄ，但係佢無錢還，結果不斷申請ＣＲＥＤＩＴ ＣＡＲＤ去還錢，每個月只還ＭＩＮ ＰＡＹ，結果差成６萬至８萬元，佢走上去財仔借錢，借一萬蚊，但手續費要$1500，即係到手嘅只有$8500，到期要還$13000。追問之下，原來係佢當初太識飲識食，為左係女仔面前威而咁樣做，好啦，而家個女仔知道佢差銀行錢，已經飛左佢，佢真係人財兩空，呢位人兄而家打算休學，打工還錢先，唉，真係早知今日何必當初呢。
銀行搵錢真係好容易，信用卡申請門檻低，再加上理財能力差，大家好容易中招，萬劫不復，所以我一向堅守自己嘅原則，有足夠金錢先可以買野，一用信用卡買野，當晚就會即刻還錢，絕對唔會用信用卡預支，否則就叫「先洗未來錢」，好容易中招！否則，到時差銀行咁多錢就係柒男而唔係型男！記得要威同時戴番頭盔！！
2012年3月15日 星期四
型男的最大興趣
大家千其唔好覺得我以下嘅呢幾句說話係廢話，
「只有追求型嘅男兒，才有條件成為型男」，
「正所謂人生在世，最緊要型」。
一、定義型男
閣下如果係覺得：
(1)單純淨係靠執下個Look；
(2) CHOK下個樣CHOK下D動作；
(3)無時無刻行Catwalk咁去行街......
以上呢d就叫型。
然後就以呢d所謂型，去達到閣下想型而得嘅效果，
包括把妹、矚目、受萬民景仰等等。
嗯......無可否認，個外貌都係唔係唔重要，
但事實上，個樣係天生，尤其男人又冇得化行妝出街，
咁最後外貌除了真係靠五成後天加工，都有五成就真係睇副偈。
事實上，同我們身邊嘅女生傾計嘅時候，都不難發現，
根本不同嘅人，男人好女人好，都有自己不同嘅型男定義。（眾怒）
嘿！唔好怒住，聽我講埋。
因為大家諗深一層，型真係有好多種，可以用低端、高端分；可以用內在、外在分，
唔同人都有自己一把尺，例如d腦筍都未生埋嘅靚妹可能覺得d執look chok樣嘅潮童型，但思想較成熟或者有個別喜好嘅，又可能覺得學校教物理但樣貌平平嘅阿sir型呢！
二、理性認知
閣下一定要清楚了解，「一個人可以暫時服侍全部上帝，或者可以永遠服侍少數上帝，
但就絕不能永遠服侍全部上帝。」
所以！想成為型男嘅人，最重要嘅，就係清楚地了解：
(1) 自己呢塊原料適合變成甚麼類型。
是文才型？是運動型？是成就型？還是潮流型？...
副偈、性格、人造外貌、行為舉止，幾樣要加埋要match囉。
你地諗下唐英年著黃偉文d衣著，學林峰chok樣會係咩情況...
(2) 到底想打咩市場。
其實，一項產品嘅本身情況，都幾影響自身在不同市場嘅表現...
高端用戶群，首要考慮嘅可能係氣魄、意志、能力、愉悅、品味；
低端用戶群，首要考慮嘅可能係外貌、即食、有名...耐用？
三、再深一層
有d sense 嘅人可能越睇越出奇，點解好似怪怪地？
或者講到呢度，我地重新反思一個問題，
點解要型比人睇？
難道唔可以型比自己睇咩？
其實呢個問題好死嘅，根本係哲學問題，
或者咁講啦，睇下大家有想點囉，要自我感覺良好唔需要人認同嘅...(其實都唔使追尋點樣先可以型啦)
大家老老實實啦，要搵到黎呢度嘅無非都係自己本身唔可以成為自己自信嘅基礎同根源，
先致想型比人睇啫，
咁反正上述第一第二部分，無論對想型比自己睇、或者型比人地睇都啱用嘅，對象唔同啫。
四、但最終極的一點
「只有追求型嘅男兒，才有條件成為型男」 ，
只有從心理上，都真正想型嘅人，
才可以型得起。
無論閣下想型比人睇定型比自己睇，
如果都唔係真心，或唔重視呢樣野，
還型甚麼？
2012年3月12日 星期一
別糟蹋你的善心
心善，是做任何事的通行證。
不過，每個人某些時候總有自己的難處，想做善事總會有點力不從心。見到賣旗也好，愛心券也好，甚麼籌款也好，有心既，咪捐少少，心意遮，太陽男左邊個褲袋點都會有幾個碎銀傍身。不過碎銀總有用哂既時候，通常剛好又見到有人走埋黎賣旗呀賣愛心券呀，係有心無力既時候，又唔知大家接下來既反應會係點呢?
A. 扮睇佢唔到(或扮佢睇你唔到)
B. 扮係個袋搵再同佢講無碎銀，只有大紙
C. 問佢係咩慈善機構，反問佢有無合法註冊等
其實真係遇到咁尷尬既情況，大家只需微笑一下，搖頭一下便可。既有禮貌，又夠瀟洒，前提是你的微笑是一個怎樣的樣子。
細微的反應或行為已經可以令人增添一種型的味道。
但緊記，量力而為。
過了火，就難說了。
相信大家都睇左《小KEN KEN興趣篇》段片
小KEN KEN不畏艱辛，不論係飛身執紙、定係奮身執書
全無替身，真人上陣，顯現出佢助人之心
特別係片中0：54秒個畫面，連貌似跑去捉賊既跨欄動作都有
執書遮.....
咁熱誠點唔會嚇親人丫
不過，那赤子之心，我太陽男好欣賞!!!
不過，每個人某些時候總有自己的難處，想做善事總會有點力不從心。見到賣旗也好，愛心券也好，甚麼籌款也好，有心既，咪捐少少，心意遮，太陽男左邊個褲袋點都會有幾個碎銀傍身。不過碎銀總有用哂既時候，通常剛好又見到有人走埋黎賣旗呀賣愛心券呀，係有心無力既時候，又唔知大家接下來既反應會係點呢?
A. 扮睇佢唔到(或扮佢睇你唔到)
B. 扮係個袋搵再同佢講無碎銀，只有大紙
C. 問佢係咩慈善機構，反問佢有無合法註冊等
其實真係遇到咁尷尬既情況，大家只需微笑一下，搖頭一下便可。既有禮貌，又夠瀟洒，前提是你的微笑是一個怎樣的樣子。
細微的反應或行為已經可以令人增添一種型的味道。
但緊記，量力而為。
過了火，就難說了。
相信大家都睇左《小KEN KEN興趣篇》段片
小KEN KEN不畏艱辛，不論係飛身執紙、定係奮身執書
全無替身，真人上陣，顯現出佢助人之心
特別係片中0：54秒個畫面，連貌似跑去捉賊既跨欄動作都有
執書遮.....
咁熱誠點唔會嚇親人丫
不過，那赤子之心，我太陽男好欣賞!!!
日行一善，型過弗得！
做多D善事，個人心地好，個樣都會好睇D，正所謂相由心生。
我禮拜日得閒都會扶阿婆過馬路！不過，大家做善事時真係要睇清楚。我講緊幫人買旗呀！我印象中以往賣旗籌款係星期三、六和日呢3日。但係唔知點解呢排係街道上充斥主好多賣旗嘅人，一星期賣成5、6日。係唔係路呀？
睇真D，原來係D不知名嘅「慈善團體」，而受益對象仲係一D我好討厭嘅人。我討厭D乜唔重要，最重要係我覺得捐錢比佢地條氣唔順。
香港買旗係咁樣：
義工行埋黎，說：「先生，幫手買支旗啦。」
香港人：「哦。」說著，把手伸進褲袋，拿幾個大洋放入旗袋。
義工一邊幫你貼，一邊說：「多謝。」
我地可以睇得出，成個過程係捐款人係完全唔知道佢嘅善款會捐去邊到。
咁樣買旗不如唔好買，都無心嘅。只係一個例牌動作。
我唔係執著個十幾廿蚊，而係做善事都要值得先嫁。所以幫人買旗真係要睇清楚D。
另一樣我想講嘅係坐車讓座。網上好多人話香港大陸化，其實我睇未必。事關我坐開鐵路，見到好多後生仔、後生女都會主動讓座比有需要嘅人。不過，我留意到有一種人係好想讓座而又怕羞，覺得讓座呢個行為比其他人覺得「扮野」、「造作」，其實自己覺得岩嘅，又有咩問題？宋朝時，曾鞏寫過一篇〈贈黎安二生序〉：「謂余之迂為善，則其患若此。謂為不善，則有以合乎世，必違乎古；有似同乎俗，必離乎道矣。」呢句大約就係話自己覺得岩就做，洗乜理世俗眼光？更何況世俗未必係岩嘅。各位型人你地唸唸啦。
2012年3月11日 星期日
天生就是錯?!
話說某天下午，小妹接二連三遇上一個冬菇頭怪人，着實給他嚇了一大跳，神經病!(開口埋口「媽咪話」，重要誇張到飛身執書，使唔使啊!?宜家叫你「歡樂滿東華」定還是拍緊「成龍」先?)
我就曾經聽過一位好口衰，但有獨特見解的朋友講，「世界就係唔公平，有人靚自然有人醜，靚個啲呢，先天條件好，容易憑樣討人鍾意，所以心地差啲都可以理解，唔係古語點會有『蛇蠍美人』啊！至於醜樣個啲呢，功利啲講句，因為本身先天不足，所以局住要善良好心，用嚟爭取返大家的好感度嘛。當然總會有人犯賤，做到最極端，呢個就唔好提。所以呢，童話故事係呃小朋友，出到社會就唔同講法......(下刪一萬字)」
雖然我明白以貌取人不正確，但要改變一個人的看法也非一時三刻的事。我極之欣賞「冬菇頭」朋友熱心助人的好品格，正如郭教授講「睇文章要先睇人格」，問題是容忍是有限度的。真心奉勸那位仁兄一句，如果真的想吸引女神注意，請改變出場方式和說話方式，我絕對有理由相信，假使女神真的有甚麼頭暈身興，情願死都未必想你幫佢。(我真係嚇親，如果佢再出現係我面前，我是有打佢嘅可能~)
所以身為型男有一兩樣興趣並不出奇，要知道吸引女神是目的，懂得如何發揮和展示是手段，然而有目的但手段差得一塌胡塗，縱使更多有很好的興趣、本領，也無法討得女神歡心啦！從一開始就霸氣盡失，到最後重落得「四大皆空」的下場，你話死得幾悲壯！
聽我講，兄弟！如果真係想部腦行得快，猛裝軟件無意思，不如執執個硬件先啦!
想知道我的悲慘遭遇，大家可以click以下片段。如你認識或知道「冬菇頭」的去向，請留個comment，幫我揖兇呀！我實打佢小人~
心善則型
老老實實，話我嘅興趣係做好事的確係吹得太大（汗……），而且盲嘅都睇得出段片有誇張成份：一來世界上唔會有人善良到好似郭教授咁，比人老笠咗個袋都仲能夠保持咁冷靜，二來如果喺街到咁做我應該比差人拉咗十世，仲點能夠有機會同巴打們分享型男心得呢？
雖然小kenken並唔係咩大慈善家，不過亦都唔算冷血動物，因為Blog一開頭唔記得邊條友仔講過，型要係發自內心既，老土啲講即係「心善則美」。所以閣下要型得起嘅話，首先就要從做好事開始，以下為小kenken推介善事排行榜三甲：
第三位：賣旗（難度：１／１０；有型指數：８／１０）
難度最低、最容易做到，亦都係小kenken每星期必做既善事！其實買旗最多只會花你幾蚊同唔夠一分鐘嘅時間，大家又何樂而不為呢？有時喺街見到啲外表高大威猛、氣宇軒昂嘅男士，見到有人賣旗就即時兜路走，仲慘過叫佢去死咁，認真霸氣盡失！
第二位：捐血（難度：５／１０；有型指數：９／１０）
型男們會唔會苦惱同女神出街唔知去邊好？而家比個好提議大家，就係去捐血啦！除咗幫到人之外，仲可以喺女神面前展露出你man嘅一面！怕痛嘅你都唔洗驚，因為小kenken捐過三次血咁大把，全部都好似比蚊針咁，完全無痛嘅感覺，型男們仲唔快啲行動，約埋女神奉獻出你寶貴嘅血液啦！
第一位：急救（難度：８／１０；有型指數：１０／１０）
正所謂人不可以貌相，大家從外表係咪睇唔出小kenken識得急救呢？都係果句，學急救除咗可以幫到人之外，仲好型添！試想如果你同女神出街，咁o岩得咁橋條街有人暈咗，又係你展現男子氣概嘅時候！更極端嘅例子係，touchwood講句，女神有咩三長兩短嘅話，閤下識得急救隨時能夠救返佢，咁佢條命就係屬於你架啦，如果女神需要做埋人工呼吸就更perfect！Btw，其實以上講嘅都係得淡笑，急救點都係以幫到人為主，不過識多樣技能點都會對提升你既個人魅力有幫助！
2012年3月8日 星期四
2012年3月7日 星期三
興趣不能太多
型男講座已講了兩種興趣－－音樂與攝影。
剩下的兩位型男的興趣尚未揭曉。
其實，尋找屬於自己的興趣時，切勿抱「人有我有，人型我跟」的心態。
這樣做的壞處太多了，就例如：
天下興趣太多，你可以學哂嗎？
這項興趣真的是你想要(喜歡)的嗎？
最後，你只會樣樣都半桶水。我寧願找一兩項自己真心喜歡的去做，咁樣先至有意義！
我小時，「玩」左好多野，試過好多唔同嘅興趣、課外活動，我可以咁樣做，因為時間太多，唔洗工作，只係要讀書，所以我相機、模型、不同的樂器等等都「玩」過，但無樣玩得精，而且係無Spirit 係入面。直至聽到一位老死講，「興趣唔可以太多」，我先至停低落黎，深思左一排，最後就將我有d唔係真心鐘意嘅興趣踢走，到而家我都有幾項興趣一齊發展緊。
我唔反對大家試新野！試多D係好事，大家咁後生，有咩要怕？但到適當時候，就應該要停落黎，始終吾生有涯！你邊追得咁多，大家千奇唔好做一隻「無腳嘅雀仔」！
大家記得跟實我地！聽日將會有一位型男展現佢嘅興趣出黎！！！
2012年3月6日 星期二
唔識影相咪做型男
攝影，先唔好當係藝術
識我太陽男既朋友仔都知，我確實係一個攝影撚(多謝菠菜蓮幫我起左呢個咁有氣勢既名)。玩左咁多年相機，經驗話我知，你唔識影相，就同「無膀頭無腰骨既男人」一樣，你輸左一半!! 仲要做型男? 算把啦。
影相，基本功要識，唔駛人講，自己去學。睇書，實戰，睇書，再實戰，兩年後你一定係一條好漢! 我絕對咁寫包單。工具方面，要CANON定NIKON，咩白鏡紅圈，鏡要長定要短... ...唔駛煩，你只需一部普通相機便夠了。
點玩相機先會型?小KEN KEN已經向大家介紹左其中一樣，就係識幫人影。要擺咩POSE，點樣影到瘦(你變瘦我咪影到瘦囉)，唔夠光又點算... ...你可以係瞬間解決到以上問題之餘仲可以影到張正常既相，你係人地心目中會突然加左10幾分(無錯，唔駛好靚，係咁惡劣環境影到正正常常既相人地會覺得你好叻!!!)。你，型左!
舉個例，影學者，點影?
專心做野既男人係最野，影低佢
就算係沙漠，你都要影到!(郭老既可愛樣子，難求呀)
仲有一種，就係閒影，唔一定影人，風景呀，物件呀(玻璃碎個啲都得)，用相片展現你感性既一面，讓人有更多角度了解你，你睇家下有邊個唔識周栢豪???
雨常見，但配以異地街燈色調，這場雨的形態便更美...
我用了十五分鐘去細心欣賞，再為其拍照
但呢個需要尖銳既眼光，你可以玩得再高層次啲，當係藝術咁玩，不過慢慢來吧。
2012年3月4日 星期日
光影留情
睇見太陽男打爛隻玻璃杯都可以咁有感觸，仲要幫佢拍埋寫真，除左要讚賞下佢感情豐富之外，亦都令小弟忍唔住要分享一下對影相既睇法。小kenken認為，作為一個型男，無論如何都要對影相有返一定程度既認識，事關日常生活中實在有太多加分位，比各位巴打係心儀嘅女神面前展露一下攝影嘅技術啦！以下只係其中兩個例子：
處境一：幫女神影相
假如巴打們有幸能夠同女神單獨郊遊，喺別無選擇嘅情況之下，閣下亦順理成章地成為左女神嘅攝影師。只要閣下能夠把握機會，把握天時地利人和，為女神影返輯靚靚寫真，除咗能夠博得紅顏一笑之外，又或者博到女神一句：「阿邊個邊個，你影相好叻呀！可唔可以教我呀？」分分鐘有機會由兵仔晉升做軍官，喺女神裙下嘅眾多士兵中突圍而出，到時仲唔得米？不過前提係你要成功約到女神出嚟先！（有型指數：9/10）
處境二：自拍靚仔相
咩話？女神唔肯同你出街？應該9成9係閣下嘅樣貌出事，事關10個女仔有11個都鍾意靚仔（起碼小kenken身邊既女性嘅朋友係咁），正所謂「工欲善其事，必先利其器」，劏豬嘅都要磨利把刀，搵工都要執靚份CV啦，更何況係溝女？閣下大可好似下面位仁兄咁玩下自拍（上），必要時更可披上PS裝甲（下），然後再放上facebook，務求做到隱惡揚善，將自己嘅優點無限量放大，只要能夠成功咁用一張靚仔相約到女神出嚟，咁你已經成功咗一大半！就算之後比對方投訴貨不對辦，你都可以好驕傲咁同人講話自己曾經同過女神出街！（有型指數：8/10）
溫馨提示： 將相片光度較暗可以令塊面無咁肥（資料來源：曾卓然老師＠OU）
處境一：幫女神影相
假如巴打們有幸能夠同女神單獨郊遊，喺別無選擇嘅情況之下，閣下亦順理成章地成為左女神嘅攝影師。只要閣下能夠把握機會，把握天時地利人和，為女神影返輯靚靚寫真，除咗能夠博得紅顏一笑之外，又或者博到女神一句：「阿邊個邊個，你影相好叻呀！可唔可以教我呀？」分分鐘有機會由兵仔晉升做軍官，喺女神裙下嘅眾多士兵中突圍而出，到時仲唔得米？不過前提係你要成功約到女神出嚟先！（有型指數：9/10）
成功例子
失敗例子
處境二：自拍靚仔相
咩話？女神唔肯同你出街？應該9成9係閣下嘅樣貌出事，事關10個女仔有11個都鍾意靚仔（起碼小kenken身邊既女性嘅朋友係咁），正所謂「工欲善其事，必先利其器」，劏豬嘅都要磨利把刀，搵工都要執靚份CV啦，更何況係溝女？閣下大可好似下面位仁兄咁玩下自拍（上），必要時更可披上PS裝甲（下），然後再放上facebook，務求做到隱惡揚善，將自己嘅優點無限量放大，只要能夠成功咁用一張靚仔相約到女神出嚟，咁你已經成功咗一大半！就算之後比對方投訴貨不對辦，你都可以好驕傲咁同人講話自己曾經同過女神出街！（有型指數：8/10）
溫馨提示： 將相片光度較暗可以令塊面無咁肥（資料來源：曾卓然老師＠OU）
今次講住咁多先，比時間巴打們苦練下攝影技術，work唔work就睇大家嘅造化！
2012年3月2日 星期五
訂閱：
意見 (Atom)