型lism

話說呢個農曆新年假期，我俾兩個字煩左我好耐！

一個就係親愛嘅郭教授俾落嘅功課，叫我析「仁」；

第二個就係呢個「型」字！

「仁」嘅解釋，相信可以喺孔慶東嘅新聞入面略知一二，

咁「型」呢？咩係「型」？？？

暫時冇一本參考書可以話到俾我知！

《說文解字》話：「鑄器之法也。从土刑聲。」

咁啫係點？同冇睇過係冇分別！

而家我讚人好型（又或者我俾人讚我好型ＸＤ），跟本就唔可以單喺字面度搵到解釋！

我又喺 iphone個英漢字典度search吓啦咁

個 result係……

就唔係話靚仔就大哂嘅！

更何況……又點先係靚仔先？

點先叫 fashionable先？

於是我嗰組有四條自稱係「型」嘅茂利，就話要用行動證明自己有幾「型」！

一個就毒男扮型男；

一個就以為自己係山下智久、木村拓哉；

又有件話自己係未來郭老；

仲有件話自己有咩陽光氣息、魅力沒法檔……

節省小小啦唔該！

乜「型」就係咁嘅咩？

我覺得「型」係應該與眾不同、獨一無二架囉！

嗰四件嘢求其喺旺角一個招牌「責」落黎都唔知死幾多件啦！

「型」你老鼠！！！

所以由細到大我都覺得全世界最「型」嗰個一定係我爸爸，

因為我得一個爸爸！一個人哋冇我有嘅爸爸！

你睇你睇，係咁咦一個人對「型」都已經有咁多唔同嘅睇法，

你叫我點落個定義俾佢先？！

懸紅一億！！！

求「型」之準確定義！！！

你定到我話你好嘢！！！

同場加映：蓮爸爸賀新歲<3

型到似太陽

     你有無試過扮到好似你偶像咁型仔，出街個陣覺得自己今日條腰挺得特別直，覺得多左路人，特別係女仔望住你 ?

     你訓醒未 ?

     發哥夠型啦，劉華都唔錯，你扮唔扮到先 ? 簡單啲，Calvin Klein 既男model淨係著住條三角底底都MAN到出汁，但你著唔著到咁MAN咁型先 ? 你得既話，我幫你影A1既大海報送俾你!!!

     模仿偶像既外型係行唔通，係無個性。模仿埋偶像既內涵，更係無腦。

      型，係要有個性的，唔駛成日要比人地突出，要威比人睇，其實做番自己就得。唔好淨係著重衣物既配搭，造型千變萬化，有排你學，所以應從內涵著手。

     型，係一種感覺，應該留意自己散發緊咩感覺俾人，呢種感覺要舒服既。舉個例，你成日都愁眉苦臉，俾人地一種負面既感覺，人地都仲點會再留意你丫。相反，好似我太陽男咁，淨係個名都已經有擋唔住既正能量爆發出黎。呢種正能量所散發出黎既感覺，就係我本身型到不行了既特徵——陽光氣息。

     點樣可以加強陽光氣息呢 ?

     有自信 ! 唔好成日愁眉苦臉，黑口黑面。心境豁達，處於積極狀態，自信先會係面上流露出黎。女孩子鍾意有自信既型男架。當你充滿自信既時候，頭會不自覺咁昂揚起來。而你對眼本身就算細到睇唔到，都會變得有神。而笑容會掛係臉上，更令人增添多份親切感。扮COOL唔係唔得，但你COOL到無表情，好似生人勿近咁，又點做萬人迷呢 ? 笑多一點，燦爛咁笑，將你心中樂觀既性格表現係表情上。笑容可以會有種溫暖親和既感覺，好似陽光咁正，把這種感染力散發出黎，仲唔掂 ? 你睇，連長頸鹿都被我既笑容吸引住，你都咪話唔抵死 !

     陽光氣息唔係人人都有，毛澤東背後都有個紅太陽啦，但你唔多覺得佢掂，點解 ? 因為陽光是令一切充滿生機，與年青人的活力是最配合。去沙灘滑浪，打波既，都可以令人有這種感覺。

想知更多 ? 繼續留意我地既「型男講座」啦 !

《勇毅為「型」》

現今，各家對於人的「美」都有著不同的看法。有人重視外在的美，所以那些甚麼纖體公司、美容公司就大行其道，大肆叫囂著那堆催眠人的口號，滲透著歪曲的思想。

重視外在的美，人之常情，是沒有錯，畢竟人類體內保存著原始的基因──認定外在美決定著該個體的好壞。但人類從脫離原始動物階段，組織分工，結成社會，發展文化，創造文明之後，除了原始生理上的欲求以外，就發展出品德上、思維上、精神上的「美」。

這些品德上、思維上、精神上的「美」，簡單來說就是內在的美──亦正正是這個日趨奇異的世界，慢慢開始淡薄、漸漸開始漠視的──某種人類賴以異於動物的「精神上的差別」。

動物，也許為了生存之外，亦有精神上的追求，比如愛、比如保護後代。但是，人類，人生在世，除了糊口、除了生存，我信，每個人都有所想追求的未來。

然而，敢於追求理想、敢於征服困難，所發揮出的這種無所畏懼的氣質，一種併發生命熱情的本質。有如運動員在咬緊牙關地向終點衝刺，飛鳥為衝上雲霄而振翅奮起而上，這種排除萬難所產生的魅力，讓人心存敬畏，讓人有一種如閱讀時讀到激昂處而頭皮發麻的顫抖。

這種勇毅，堪稱「型絕」。

用自己雙手，創造價值

型棍我點睇

型棍我點睇

我認為「型」係由外表表現出黎。簡單黎講，你嘅外表已經決定一切。而最影響外表嘅因素，必定係衣著。正所謂人靠衣裝，你著得難睇，又點會好睇？更加唔好講型。有人話內涵係重要，我無否認，不過你會將內涵掛係身邊？街邊人得鬼閒走埋你身邊研究你內涵呀，緊係先要有型棍嘅外表吸引到人，再將你嘅內涵展現出黎啦！

香港人至岩日系衣著

「嘩！Johnny Depp 古著好型， Dicaprio巧帥，Tom Cruise好有佬味」，對唔主，如果你係土生土長嘅香港人，以上都唔係你學習對像。因為佢地係鬼佬，身材先天已經贏我地幾條街。有人會話湯告魯斯係矮仔，老老實實，人地夠橫，骨架夠闊，著衫唔會咁易跌膊先。

將目光轉向鄰國，平均身高得170嘅日本仔，出產好多靚仔型男。架仔係衣著上絕對值得我地香港人學習。

切忌著得浮誇

去一D日本街頭SNAPSHOT 網站，大家會發現6成以上架仔著衫係誇張得離譜，大膽嘅撞色，X-Men般嘅黑超，28吋腰圍著36吋嘅爛牛…… 如果你係咁重口味(見右圖)，你可以禁「返回上一頁」，我東瀛羊羊唔太岩你。須知日系都有好多種，要將各類風格明確定義仲難過行蜀道（就算我用一大篇文字咁解釋，我相信你唔會明，亦都無心機睇）。因此，我唔直接答你，用例子答你──木村拓哉。

木村拓哉之我見

稍為睇過潮流雜誌嘅朋友，都知道木村著過嘅衫往往可以炒高幾倍價錢。有個出名嘅例子，就係沖涼猿人( Bathing APE) 嘅啡色大褸，呢件褸炒價曾經高達2萬5千港元(見左圖)；Levi’s Vintage Clothing 出過一條66年501牛仔褲，木村一著佢登台，立刻賣斷市，木村係潮流界嘅威力絕對不能忽視。總之，任何比木村著過嘅野都被尊稱為「木村著用」，話知你係咩牌子啦，連我地香港Bosco 幫Uniqlo 代言時著嘅一件羽絨都可以賣斷市就知道明星效應係幾咁勁。不過，木村係與眾不同，佢嘅潮流影響力並唔係單靠明星效應，呢條友著衫的確有Sense，你見我地香港潮童夏天30幾度都著對Red Wing[1]就知Red Wing 真係好睇，係亞洲最先帶起Red Wing 熱潮嘅係木村。朋友，你千奇唔好當我吹水玩玩下，黎緊呢十幾個Week 我將會分享我對木村係衣著上嘅心得，我將會係呢個BLOG 傳授木村嘅佬味比大家。各位男仕想變做木村嘅話，請記得我東瀛羊羊，跟實「型男講座」。

 

---

[1] 靴黎嫁

我的型男典範

　　每個人對「型」嘅定義都唔同，有人話劉華靚仔係型，又有人話要好似發哥咁成熟穩重先叫做型，總之就各花入各眼，不過如果你問我點先算係「型」，咁抽象嘅野我唔直接答你，用例子答你啦！以上幾位仁兄無錯係好型，不過對我嚟講就硬係好似差啲野咁，或者係因為佢咃就好似天上嘅星星，實在太遙不可及，絕非我哋呢啲普羅大眾咁易模仿得到……之不過係小弟心目中，仲有一個人可以稱得上係真正嘅「型」，佢唔係劉華，唔係發哥，更加唔係阿諾舒華辛力加。佢係邊個？之唔係香港公開大學嘅黃自鴻博士囉！以前嘅我生活係ACG既世界入面，型男嘅定義亦都只局限於動漫入面既人物，例如係戴志偉、渦卷鳴門、愛德華艾力克、路飛等等，每次見到佢哋出絕招好似「衝力射球」、「多重影分身術」咁，我就會真心覺得佢哋好型，有時仲不自覺咁模仿埋佢哋嘅一舉一動，可能亦都因為呢個原因，另到唔少人背後靜雞雞叫我做毒男，甚至乎開始疏遠我，莫講話女仔，連男仔朋友都唔多個，你估日日lunch time自己一條友食飯果種感覺好過癮咩……由果刻開始我發誓自己無論如果一定要脫毒變型，另果班歧視過我既人刮目相看，唔再衰比任何人睇！

　　終於皇天不負有心人！自從入左OU中文系，由我第一眼見到黃博士開始，我就知道佢已經成為我心目中嘅阿尼姆斯，永遠無人可以取代佢嘅男神地位！佢嘅「型」係包括外在同埋內在兩方面：亮麗嘅秀髮、迷人嘅眼神、霸氣嘅眼眉、挺拔嘅鼻樑、親切嘅笑容、優美嘅身段、淵博嘅知識、敏銳嘅時裝觸覺、再加上幽默生鬼嘅教學方式，幾乎集合晒成為一個完美男人必備嘅條件，一舉手一投足都洋溢出文人嘅氣質，堪稱型男嘅典範。每一次上佢嘅堂，對我嚟講都係一種享受！老老實實，你話我唔知醜又好，擦鞋又好，博出位點都好，其實我真心覺得自己有少少潛質好似黃博士咁型，唔信？拉落去望下啦！你話如果佢可以過返我一兩招型男必殺技，怕且距離洗脫人哋眼中嘅毒男形象之日都不遠矣！唔知你又點睇？

型男頭炮

林峰憑〈chok〉都攞到金曲金!!!

唔係掛!唔通真係因為佢夠chok?識chok就叫型?

咁哥哥同發哥個啲又點計先?謝霆鋒個啲又叫咩啊?

既然大家咁疑惑,就等我哋一­齊嚟探討下咩係「型」啦?

〈型男講座〉係一個特別平台，提供最新嘅「型」格方向，大家可以喺上面自由分享你嘅「型」格睇法!重有chok神從頭到腳，由內到外，教你如何型得起,想型?咁精彩記得唔­好錯過!

重唔嗱嗱聲click入http://wearesohandsome.blogspot.com/
不過入去之前記住住睇埋預告，眼利的話會有唔錯嘅發現!

預告@型男講座

要定義「型」其實好難，可以是「潮」，可以是「酷」，可以是一刻的舉動。

而你並不能用任何的詞語或意思貼切解釋得到。
「型」是一種感覺，一種突然觸動到你神經的感覺。不論是表面的衣着，內在的性格，或是個人行為舉止，只要有刻能令你產生共鳴，「型」就出現。

week 1@型男講座

「型男講座」開講

「型男講座」，開講!

歡迎嚟到「型男講座」，喺呢到你可以盡情抒發對「型」嘅睇法，我哋會每星期設定新嘅題目，俾大家可以借呢個平台發表。


唔理你係支持妖味十足的哥哥張國榮，還是〈英雄本色〉入面的Mark哥周潤發，又或者係擁護chok王林峰，甚至係近期熱爆嘅〈天與地〉四子，只要你有嘢講，不論男女，無任歡迎。而且「型男講座」更請嚟剛攞咗最chok獎嘅chok神，講授佢嘅至「型」心得，同場重有四位「猛」男博客身體力行，為我哋解釋「型」的真締，佢地為爭奪至「型」寶座，必定會有一場惡鬥，想知佢哋嘅最新發展，記住緊貼住「型男」嘅最新動向。

想由外到內，再由內到外都散發「型」，咁精彩嘅blog你點又可以唔睇?


唔驚你有意見，最怕你唔講「型」。

* 事先聲明，「型男講座」有盡一切千奇百怪，唔好擲雞蛋呀!